येवला – लासलगाव मतदारसंघात उमेदवारी मरत असलेल्या महाविकास आघाडीच्या उमेदवारांना मागील दहा वर्षांत जिल्हा परिषदेच्या देवगाव गटात कोणी बघितले असेल तर मला सांगावे, मी रोख बक्षीस जाहीर करतो. निवडून येण्यासाठी आधी चार वर्षे खर्ची घालावी लागतात. लाटेवर स्वार होऊन निवडून येण्याचे स्वप्न बघण्याचा हा काळ नसल्याने यावेळी देखील विकासच जिंकणार.. त्यामुळे येवला – लासलगाव मतदारसंघात छगन भुजबळ हे पाचव्या टर्मला देखील गुलाल घेणार असल्याचा विश्वास डॉ. श्रीकांत आवारे यांनी व्यक्त केला. देवगाव (ता.निफाड) येथील महायुतीचे उमेदवार छगन भुजबळ यांच्या प्रचारार्थ सभेत ते बोलत होते. महाविकास आघाडीचे उमेदवार माणिकराव शिंदे यांचेवर त्यांनी खरमरीत टिका केली.
छगन भुजबळ हे विकासाचे दुसरे नाव आहे. विकासाच्या मुद्द्यावरच ते यंदा देखील निवडून येतील. आमदारकी म्हंटल की आधी चार वर्षे मतदारसंघ पिंजून काढावा लागतो. आदरणीय शरद पवार आणि जरांगे पाटील यांच्या लाटेवर निवडणूक जिंकता येईल असा भ्रम उमेदवाराने बाळगू नये ; त्यासाठी जनमानसात रुजावं लागतं- असे ते म्हणाले. देवगाव जिल्हा परिषद गटात यंदाच्या पंचवार्षिक निवडणुकीची पहिलीच सभा आहे. या सभेसाठी खचाखच गर्दी झाल्याचे बघायला मिळाली आहे.
