चंद्रकांत जगदाळे : निफाड न्यूज.
येवला – लासलगाव मतदारसंघातील महायुतीचे उमेदवार छगन भुजबळ यांचा विंचूर गटातील प्रचार संपवून काल (दि.10) सौ. विशाखा पंकज भुजबळ यांनी पाटोदा गटातील मतदारांच्या भेटी घेतल्या. या प्रवासात शिरसगाव – लौकी (ता.येवला) येथे रस्त्यालगत काही महिला कांदा लागवड करत असल्याचे विशाखा भुजबळ यांनी बघितले. त्वरित चालकास वाहन थांबण्याच्या सूचना देऊन कार्यकर्त्यांसह शेताची वाट धरली. यावेळी कांदा लागवडीत व्यस्त असलेल्या महिलांसोबत संवाद साधत समस्या जाणून घेतल्या. कांदा लागवड प्रक्रिया ते विपणन व्यवस्थेपर्यंतची माहिती शेतकऱ्यांकडून समजावून घेतली. हातात खुरपे घेऊन कांदा लागवड करण्याची अनुभूती देखील घेतली. विशाखा भुजबळ यांनी महायुती सरकारने माहिलांसाठी राबविलेल्या योजना समजावून सांगितल्या. यावेळी महिला पदाधिकारी यांचेसह कार्यकर्ते मोठ्या प्रमाणात उपस्थित होते.
