चंद्रकांत जगदाळे : निफाड न्यूज.
येवला – लासलगाव मतदारसंघात यंदा पंचवार्षिक निवडणुकीत 13 उमेदवारांनी नशीब अजमावले होते. त्यातील दोनच उमेदवारांना आपले डिपॉझिट वाचविण्यात यश आले आहे. अन्य 11 उमेदवारांवर डिपॉझिट जप्तीची नामुष्की ओढवली आहे.
काल (दि.23) झालेल्या मतमोजणी निकालात छगन भुजबळ यांनी मुख्य प्रतिस्पर्धी माणिकराव शिंदे यांना चितपट केले. या निवडणुकीत छगन भुजबळ यांनी 54.15% टक्के मते घेतली तर माणिकराव शिंदे यांनी 43.59 % टक्के मते घेतली. तर उर्वरित 11 मतदारांमध्ये 2.26% टक्के मते विभागली गेली. निवडणूक आयोगाने आखून दिलेल्या वैध मतांची संख्या गाठता न आल्यामुळे अमोल आहेर, दीपक पाटोदकर, अमोल गायकवाड, जालिंदर खैरनार, जितेंद्र गायकवाड, नरसिंह दरेकर, प्रितम शहारे, भागवतराव सोनवणे, विलास देहाडे, शिवलाल धनवटे, शुभम नाकोड या उमेदवारांचे डिपॉझिट जप्त झाले.
डिपॉझिट जप्ती म्हणजे काय ???
उमेदवारी अर्ज दाखल करतांना उमेदवाराने डिपॉझिट रक्कम भरलेली असते. लोकसभा किंवा विधानसभा निवडणुकीत उमेदवाराला एकूण वैध मतांपैकी 1/6 मते (16.67%) मते मिळविणे आवश्यक असते. ही मतांची संख्या गाठता न आल्यास सदर रक्कम जप्त केली जाते. सदर रक्कम सरकारच्या तिजोरीत जमा केली जाते.
